L’Asociación Cultural de la Llingua Llïonesa El Fueyu ye una asociación cultural que naz nel añu 2001 cul finxu de fomentare la conocencia y deprendizax d’esta llingua ente la sociedá en xeneral, y la llïonesa en particular, agora mesmu arrequeixada y marxinada pula educación obligatoria únicamente en castellán nel estáu hespañol, ou portugesa nel estáu portugés.
Dende la sua nacencia, L’Asociación Cultural de la Llingua Llïonesa El Fueyu lleva trabayandu enforma pa llevar a tola sociedá’l mensax de la presencia de la nuesa llingua al traviés de milentas autividaes: cursos de llingua llïonesa, trabayos, conferencias, xornadas, espublizaciones ou días de la llingua...todas eillas sofitadas y entamadas conxuntamente cuna principales alministraciones públicas del País Llïonés y entidaes culturales privadas y públicas, asina cumu outras asociaciones cumu La Barda ou El Toralín, que tán pulos mesmos oxetivos que nós.
Tenemos un nidiu compromisu cuna nuesa llingua, la sua necesidá de revitalizala y renormalizala nel sou usu en tolas estayas sociales, seyan públicas ou privadas, presonales ou coleutivas. Purque la llingua Llïonesa fou y ye la nuesa llingua propia, la mesma na que tenemos escrita la nuesa llexislación, de las más antiguas d'Europa, y las primeiras Cortes Democráticas de la historia, los nomes de los nuesos llugares, los nuesos topónimos...En resume, tola nuesa rïalidá cumu pueblu, cumu identidá cultural presente a lu llargu la historia que desix los sous dreichos.
P'algamar esti finxu ye imprescindible la conocencia de la llingua llïonesa, la sua puesta en valor y desendolcar un procesu de renormalización onde la nuesa llingua deixe sere daqué estrañu, vulgarizante y minorizante y retome'l llugar que ye cuerrespuende. |
