La organización llïonesista Conceyu Xoven dióu una rueda prensa na qu'amosaba la sua apuesta decidida pur un dominiu .lli pa las páxinas en Llïonés.

Na mesma rueda prensa'l secretariu xeneral de Conceyu Xoven, Abel Pardo Fernández, deixóu nidios cuáles son los requisitos pa la concesión d'estos dominios, cumu que sólu s'otorgan "a comunidaes llinguísticas ou culturales cun clara presencia na rede", y que la estensión .lli ye la única posibilidá válida yá que "ye la estensión na llingua, mesmu que los bretones trabayan pur un dominiu propiu pa la llingua y cultura bretona cuna estensión .bzh que son las lletras qu'idetnifican a Bretaña en bretón, Breizh".

Al respeutive d'un posible dominiu .leo, cumu apuntan deillas propuestas sobru la tema, Pardo siñalóu que "la ICANN, que ye'l muérganu que concede estas estensiones, nunca otorga estensiones a referencias xïográficas que nun seyan estaos ou dalgunas colonias esceicionalmente" poniendu cumu exemplu que "pur esa regla tendríamos un dominiu .cyl, ou dominiu pa la Virxe del Camín .lvc".

Nas cabeiras datas, una propuesta del escritor madrileñu Antonio Nevado, apostba pur un dominiu propiu pal País Llïonés, siendu la sua estensión un .leo ou un .lli, deixandu la oción definitiva a decisión de los propios llïoneses y alderique públicu que s'abriera cun eillu.

Más información en prensa escrita:

Diario de León (Xineiru y 5, 2006)

La Crónica El Mundo (Xineiru y 5, 2006)

L'Asociación Cultural El Fueyu, cul patrociniu de Caja España al traviés de la sua Obra Social, organiza sus II Xornadas de Llingua Llïonesa nas que se tratarán ente outras temas las vinientes:

• Situación de la Llingua Llïonesa autualmente
• Analís de la reforma estatutaria de la comunidá autónoma y reconocencia del Llïonés
• Presencia de la Llingua Llïonesa na sociedá la comunicación
• Aplicación de las nuevas teunoloxías pa la difusión y conocencia de la Llingua Llïonesa

Las xornadas asucederán los días 27, 28 y 29 del mes d'avientu, de 10:00H a las 14:00H y de 17:00H a 20:00H.

Estas xornadas tan empobinadas a los nuesos socios que tan agora mesmu impartiendu clases pur distintos puntos de la xïografía llïonesa, cumu complementu formativu y pedagóxicu.

L'Asociación Berciana en Defensa de la Llingua Llïonesa El Toralín y l'Asociación Cultural de la Llingua Llïonesa El Fueyu, en collaboranza cul Instituto Leonés de Cultura, Conseyu Comarcal del Bierzu, Conceyu Xoven y el patrociniu de Caja España, impartirá'l II cursu de Llingua Llïonesa en Ponferrada.

La duración del mesmu sedrá dende'l mes de xineiru a xunu de 2007. El preciu de la matrícula ye de 15 euros.

Pa más información y matrículas pue pasase pula sigiente direición: Plaza Fernando Miranda nº 5 enteplanta, de Ponferrada. Ou bien contautare cul correyu lleutrónicu: el.toralin@gmail.com

información na web d'El Toralín: http://www.eltoralin.com/cursu.php

L'Asociación Cultural de la Llingua Llïonesa El Fueyu, en collaboranza cul Instituto Leonés de Cultura, Conceyu Xoven y UPL-Coyanza, impartirá'l primer cursu de Llingua Llïonesa en Coyanza.

Las clases tendrán llugar na sede de la agrupación llocal de la Unión del Pueblo Leonés, tolos sábados n'horarios de 17:00H-19:00H. El preciu la matrícula ye de 10 euros pur presona. El cursu escomenzará en diciembre y 2 del 2006 hasta la cabeira selmana de mayu, 2007.

Pa más información chamar al teléfonu móbil: 625 612 062

Anque las espeutativas yeran bonas la rïalidá superóu tolas previsiones: 23 alunos matriculaos y gran cantidá de presonas que chamonun al 980530248 confirman que los zamoranos amuesan un gran interés pula Llingua Llïonesa y que quieren conocela y deprendela. La sala quedóu pequeña p'acoyer a tolas presonas que fonun a la primeira clas.

La repercusión mediática tamién fou verdadeiramente grande: emisoras d'arradiu y prensa escrita zamorana tan dandu una escelente cobertura informativa d'un cursu que supón un fitu importante na conocencia y esporpoye de la nuesa llingua. Podedes velu na seición espublizaciones.

Desde l'Asociación Cultural de la Llingua Llïonesa El Fueyu agradecemos de nuevu tol sofitu amosáu pulas entidaes públicas zamoranas que dende'l primer día dionun tol sofitu necesariu pa qu'esti cursu fuera una rïalidá.